Endur trufla þingstörf

Það dróg til tíðinda í Alþingishúsinu um fjögurleitið í gær þegar nokkuð stór andahópur kom sér fyrir í hlýjunni í á meðal staðbundinna áheyranda sem þar eiga varpstað.  Mikil ókyrrð og kvak andanna trufluðu þingstörf og hleypti ótta í friðsamar áheyrendurnar og fór svo að kalla þurfti til lögreglu.  Með aðstoð þingvarða tókst lögreglu að reka út  allar endurnar, en handsama þurfti 8 endur og voru þær sendar í Húsdýragarðinn til aðhlynningar og skoðunar.  Talið er að staðbundnu áheyrendurnar skili sér á pallana á næstu dögum.

 

Aðkomuendurnar, sem búið hafa um sig við Tjörnina eru afkvæmi Hávellu og Straumandar, svonefndar Mótmælendur (Merginae Histeria) og eru af Buslandaætt.

 

Mótmælendur verpa allt árið en yfir vetrartímann henda þær eggjum sínum og getur orðið töluverður sóðaskapur í kringum varpsvæðin. Mótmælendur rekast illa með öðrum andategundum og slær oft í brýnu milli þeirra og áheyranda- og meðmælandategunda.  Mótmælendur eru töluvert stærri en hefðbundnar buslendur og finnst fólki því oft að ógn stafi af þeim, en að sögn Meindýraeyðis Reykjavíkurborgar eru þær oftast meinlausar og ekkert nema kvakið og kvæsið. Að auki eru þær nánast ófiðraðar og viðkvæmar, mjög næmar fyrir kulda. 

 

Skal athygli folks vakin á því að loka vel hitakompum og gluggum því að í kuldakastinu síðastliðna daga hafa Mótmælendur sótt í auknum mæli inn í hlýjuna.

 

Lögreglan vill benda fólki á að verði það vart Mótmælanda skal það ekkert aðhafast, en tilkynna það lögreglu strax.

Átök við Ráðherrabústaðinn

Athugasemdir

[Greppur Torfason (IP-tala skráð) 9.12.2008 kl. 13:56]

Þú ert óborganlegur Haukur!

HAHAHAHAHAHA..

Baráttukveðja,