Hvað með niðurskurð í bankakerfinu?

Á meðan fátt annað er rætt en niðurskurður og hagræðingar í heilbrigðiskerfinu virðist engu haggað í bankakerfinu.  Ég tel það rétt munað hjá mér að Ríkið á tvo af risabönkunum þrem sem eru reknir með innheimtu á skuldum landsmanna. Skuldum sem eru að hálfu afskrifaðar eftir hrun eldri risabanka.

Ég hef ekki fundið neitt í þingskjölum ennþá sem bendi til þess að þing vilji minnka umfang fjármálakerfisins sem var of stórt fyrir hrun og virðist ekki hafa minnkað mikið síðan. Eru einu aðgerðirnar á þeim bæ að skipta um kennitölur og bréfsefni?

En vegna þess að niðurskurður á stóru bönkunum virðist ekki vera á teikniborðinu gæti Plan B verið að fólk tæki niðurskurðinn að sér fyrir ríkið. Fólk myndi þá almennt hætta ónauðsynlegum viðskiptum við bankana sína. Til dæmis hætta að lána þeim launin sín (innlán) um hver mánaðarmót og hætta að nota debitkort. Með öðrum orðum snúa sér að staðgreiðslu og ekki velta þínu lausafé gegnum banka í hverjum mánuði. Borga bara reikningana um mánaðarmót og standa í skilum. Ef þú vilt geyma sparifé, sem því miður er óhagstætt, gætir þú beint viðskiptum þínum að einum af tveim sparisjóðum sem ekki stigu dans með útrásinni og lánaæðinu og gefi þeim risvöxnu frí.

Mín skoðun er að það fari betur með landsbyggðina að loka nokkrum bankaútibúum, kannski bara heilum banka. Til dæmis þessum sem tók með sér Icesave skuldina. Flest allt má gera gegnum internetið hvort eð er. Kannski má bara loka þeim öllum og landsmenn stofna nýjan banka. Eftir allt erum við almúgurinn með valdið í rassvasanum.  Við ráðum hvert viðskipti okkar fara.

 

Minna skorið af hinum stóru

Athugasemdir

[Sigurður Haraldsson, 20.11.2010 kl. 13:27]

Samála.