Getulausa kynslóðin

Merkileg könnun og ótrúlega merkileg niðurstaða.  Fjórir af fimm leita ráðgjafar á netinu. 

Ég er þeirrar skoðunar að í of auknum mæli sé unga fólkið ekki að "hugsa og tala" heldur "googla og blogga".  Kemur því ekki á óvart að næsta kynslóð verður, ef ekkert verður að gert, Getulausa kynslóðin.  Engin sjálfstæð hugsun og engin ábyrg samskipti. 

Nú þegar sjást fullmenntaðir einstaklingar gersneiddir frumlegri hugsun og verkviti stíga úr skólum.  Sprenglærður verkfræðingur getur ekki skipt um dekk, og viðskiptafræðingur upplifir kreppuna þegar bensínsjálfsalinn étur debitkortið. 

Allir Googla öllu.  Ekkert alvöru fyrirtæki er ekki með heimasíðu, og enginn veit af fyrirtækjum sem eru ekki með heimasíður.  

Það þarf enginn fara á fjöll í leit einveru og harðneskju náttúrunnar, það verður bara slökkt á ráternum.  Og það munu margir deyja ráðalausir þegar rafmagnið fer af því þeir geta ekki Googlað grunnupplýsingum um hvernig bregðast má við rafmagnsleysi. Geta ekki einu sinni googlað hvar vasaljósið ætti að vera.   Fólk mun ekki deyja þegar úti frýs, heldur þegar tölvan frýs.

Í framhaldi af því deyr mannkynið út,  því enginn mun heldur geta Googlað maka.  Facebook og aðrir stafrænir grímudansleikir, þar sem allt er fegrað og stílfært svo hinum líki, eru horfin. Enginn getur Googlað "samræður" og fengið ráðgjöf í því að tala saman face to face?

Sjálfstæði okkar er að hverfa.  Við kjósum að láta mata okkur.  Við erum að biðja um að verða aumingjar í nafni þæginda og tímasparnaðar.  Við stjórnum ekki lengur fréttum, menntun, dægradvöl, eða jafnvel mannlegum samskiptum.  Við felum okkar skoðanir á bak við notendanöfn, og treystum að Google finni lausnirnar og svörin við spurningunum. 

Er Haugurinn á blogginu sami Haugurinn og liggur heima í sófa að spyrja Google hvað á að vera í matinn? 

Tækni gæti lengt lífið, en hún gæti gelt það líka.

Segjast ekki geta lifað án netsins