Því miður í vitlausri skuldasúpu

Rúmlega fertugur útrásarvíkingur, sem lagði á sig 20 ára ferðalag frá lágvöruverslun í Reykjavík, í felum undir krosseignatengslum í þeirri von að komast til fyrirheitna landsins, Tortola, varð fyrir miklum vonbrigðum þegar hann fannst undir eignatengslunum að hann hefði fylgt rangri frjálshyggju - og var kominn í þrot.

Maðurinn, sem faldi sig nálægt stjórnmálamönnum og var festur við þá með belti, fannst þegar starfsmaður FME var að yfirfara krosseignatengslin.  „Tortola" spurði ungi maðurinn þegar honum var bjargað undan tengslunum eftir 2.800 milljarða ferðalag. En því miður - hann var staddur í kjallara gjaldþrota fyrirtækis í miðbæ Reykjavíkur þar sem hann hafði falið sig undir röngum eignatengslum.

Samkvæmt upplýsingum frá þeim sem fann manninn var hann staurblankur, uppgefinn og sársvangur en samt heill heilsu þrátt fyrir að hafa ferðast undir miklum krosseignatengslum í gegnum Ísland, Bretland, Danmörku, Luxemburg og Færeyjar.
Maðurinn var ekki með neina pappíra á sér en segist vera frá Reykjavík og heita Jón. Hann verður í haldi yfirvalda þar til örlög hans verða ráðin, það er hvort hann verður sendur aftur í lágvöruverslunina.

Því miður í vitlausu landi

Athugasemdir

[Fríða Rakel Kaaber, 7.4.2009 kl. 02:07]

Þér hefur tekist að láta mig brosa svolítið í dag! Takk fyrir það