Ekki er allt sem sýnist

N1 auglýsir að Jóhann og Guðlaug spari sér 98.415 krónur næstu 12 mánuði með því að versla hjá N1 á Tryggðartilboði N1.  Stórfelldur sparnaður sem kemur öllum heimilum vel. 

Jóhann og Guðlaug eiga meðalstóran fólksbíl og jeppa.  Ekkert er tekið fram hvað er ekið á ári, né hvort verslað sé bensín eða diesel.  Bent á heimasíðu FÍB.  Þar fann ég enga jeppa, bara bifreiðar, 1000kg, 1150kg og 1350 kg.  Þannig að ég tók uppgefið eldsneytiskostnað (-5 kr afsláttur pr.l)  886.400 kr og deildi í lítraverð bensíns.  Fæ út að þau hjón hugsanlega spreða um 6300 lítrum af bensíni á 12 mánuðum.  Tveir bílar, annar jeppi og hinn meðal fólksbíll, gætu því hvor um sig verið að aka um 20 þús.km á ári.  Sem betur fer fá þau hjón 18.000 kr. aukaafslátt auk 12.000 punkta.

 

Við hjónin eigum meðalstóran fólksbíl og Sendibíl.  Eldsneytiskostnaður okkar miðað við 20+20 þús. Km. er 618.400 kr.   Minn sparnaður 268.000 kr.

 

Dekkjakostnaður er 190.000 kr.  22.800kr í afslátt, og 5700 punktar.  Góður díll?  Eitt ber að athuga að Jóhann og Guðlaug þurfa greinilega að kaupa öll dekk ný.  Ekki skrítið því þau keyra mikið.  En samkvæmt FÍB er hjólbarðakostnaðurinn á bilinu 30.500 kr til 54.000 kr.  Ég persónulega skipti út dekkjum á þriggja ára fresti.   Jóhann og Guðlaug ættu að skoða aðra möguleika í dekkjum.  Einnig skoða loftþrýstinginn í dekkjunum því réttur loftþrýstingur eykur endingu þeirra OG minnkar eyðslu eldsneytis.

Minn sparnaður samkvæmt útreikningum FÍB allt að 110.000 kr. 

 

Dekkjaskipti 33.000 kr. er eðlilegt verð.  Jóhann og Guðlaug fá aukalega 3.960 kr í afslátt, og 990 punkta. Ég hins vegar á vetrardekkin á felgum og skipti sjálfur heima á hlaði. 

Minn sparnaður 33.000kr.

 

Dekkjahótel 16.100 kr. Hér eru þau hreinlega að bruðla þótt þau fái afslátt og punkta og allt. Af hverju að kaupa ný dekk og láta geyma þau, þegar hægt er að bíða fram á vor?  Varla eru þau að geyma gömlu ónýtu dekkin.  Ég finn alltaf stað til að geyma dekkin mín frítt. 

Minn sparnaður 16.100 kr.

 

Smurþjónusta 61.000 kr, 7.320 kr í afslátt 1830 punktar.  Ég smyr sendibílinn sjálfur, og efniskostnaður á ári er um 20.000 kr.  Frúarbíllinn fer á smurstöð, og það er 40.000 kr á 2 ára fresti.

Minn sparnaður 21.000 kr.

 

Bón og þrifvörur 12.000 kr, 1.140 kr í afslátt.  Ég hef átt sömu bóntuskurnar í nokkur ár og hendi þeim í þvottavélina af og til með sokkunum, og bónið kostar 2.990.-    

Minn sparnaður 9.010.kr.

 

Bílaþvottur 27.000 kr. ??  Jóhann ætti nú bara að hrista af sér bumbuna á þvottaplaninu. Ég kaupi tjöruhreinsi sem er á tilboði 499.- og þvæ bílana sjálfur. 12 tjöruhreinsibrúsar kosta 5.988.-  

Minn sparnaður er því 21.012 kr.

 

Rúðuþurrkur og rúðuvökvi 23.000 kr.  Rúðuþurrkurnar kosta 1500 kall hver, en þær duga ansi lengi.  Samkvæmt BOSCH heilar milljón ferðir fram og til baka.  Og á veturnar strýk ég tjöruna af gúmmíinu með nagla-asitoni konunnar (með sítrónulykt).  Kaupi þurrkur á tveggja ára fresti.  Rúðuvökva kaupi ég bara þegar það frystir og blanda 50/50 með vatni.  

Minn sparnaður 11.000 kr.

 

Jóhann og Guðbjörg kaupa svo aukalega smávarahluti 24.000 kr.Verkfæri 20.000 kr, Rekstur, fatnaður ofl 14.000 kr, og ýmislegt 14.000 kr. 

Get ekki gert neinn samanburð hér því ég veit ekkert hvað þau eru að versla.

 

Þessi pakki kostar rúmlega 1.322.000 kr en þau fá sem betur fer 98.415 kr í sparnað, ef þau nýta punktana.

 

Minn sparnaður er hins vegar 477.122 kr.

 

Ég get ekki betur séð en að Jóhann og Guðlaug gætu sparað umtalsvert meira með því að hengja sig ekki á eitt fyrirtæki, heldur skoða í kringum sig.

Athugasemdir

[Res (IP-tala skráð) 14.2.2009 kl. 13:46]

Flott tekið saman, hef einmitt verið að hugsa hvað þetta er villandi auglýsing...