Orka framtíðarinnar

Ég er búinn að vera niðri á Austurvelli í kvöld í sannkallaðri Þjóðhátíðarstemmningu. 

Allir voru kátir og í góðum gír í kvöld. Fólk heilsaði lögreglunni sem og öðrum.  Kona á sextugsaldri tók sér stöðu með óeirðalögreglunni og fylgdist með mótmælendum.  Ungt fólk með andlitin hulin var með hávaða og viðstaddir vinsamlegast bentu þeim á hvernig kvöldið skildi vera.  Unga fólkið tók því vel, sýndi andlit sín og fór að kyrja "Vanhæf Ríkisstjórn" með ungum og öldnum. 

Einhver góður maður lánaði mér pottlok til að framleiða hávaða með fólkinu.  Ég barði pottlokið og kyrjaði með.  Merkilega mikil útrás að"bonga" pottlok klukkutímum saman með mörghundruð manns.

Ég ræddi við lögreglumenn og voru þeir allir þakklátir fólkinu að snúa blaðinu við og láta reiðina ekki bitna á þeim.  Væntanlega langþreyttir því mér skilst að þeir hafi staðið aukavaktir auk venjulegra vakta þessa viku.  Einn sagði mér að hann hafi ekki séð börnin sín í þrjá daga.  Vona ég að nú fái þessir menn og konur að snúa til síns eðlilega lífs.

Seinna um kvöldið var óeirðalögreglan horfin sjónum.  Það var orðið miklu léttara yfir fólki og engin ógn eða spenna í loftinu. Fólkið var dansandi og kyrjandi með bros á vor.  Einstaka lögreglumenn gengu um svæðið en almennt var bara banastuð.

Ég skora á sófamótmælendur að fara á Austurvöll og taka þátt.  Þótt það væri ekki nema í klukkustund.  Slá á pottlok eða Macintosh dollu. Finna andann og þá feiknamiklu samstöðu sem þarna er.  Ef Ríkisstjórn gæti verið fluga á vegg og upplifað þetta myndu þeir játa sig sigraða.  Þarna er lýðræðið ljóslifandi.  Þarna er orka framtíðarinnar. 

Appelsínugul mótmæli

Athugasemdir

[Ransu, 23.1.2009 kl. 00:41]

Kíkti í hádeginu það var fámennt en hámennt.

Datt í hug hvort framtíð lýðræðis  verði ekki svipað og þegar við kjósum Júróvisjón.  Við höfum tæknina.

Hver og einn fær sinn kosningalykil (eins og bankalykil í einkabanka) svo er alþingisrás með kjörna málsvara, þ.e. fólk sem fjallar um málefnin og kynnir þau.  Enginn flokkspólitíkusarspilling. Menn geta líka skeggrætt málin og birt yfirlýsingar á blogginu og svo einu sinni í viku, eitthvert  kvöldið, er kosningakvöld.

Allir sem vilja (og eru yfir 18) geta kosið.  "49.000 greiddu já, 32.000 greiddu nei, 129.000 sátu hjá.